අරුණෝදේ සුපිපෙන මල් ගොමු මත
රොන් උරනා රන් සමනළ පැටවුනි
එපා දුවන්නට මා පොඩි පුතු දැක
නපුරක් නෑ මා පුතු මල් කැකුළකි
ගහට කොළට පොඩි කුරුළු පැටවුනට
හරිම ආදරෙයි අවිහිංසක පුතු
හිනැහෙන මල් දැක නටන සමනලුනට
ගීත ගයා තුටු වෙයි මා පොඩි පුතු
නපුරු හිතක් නෑ හිංසාවක් නෑ
නුඹ දෙස බලමින් සතුටින් හිනැහෙයි
නුඹෙ ඔය ලස්සන දේදුනු පැහැයෙන්
මා පොඩි පුතු නුඹ සිත්තම් කරාවි
ඔහු එනු දැක ඔබ සැඟවී ගියහොත්
කඳුළු වැලින් පොඩි මුහුණ තෙමේවී
මා පොඩි පුතුගේ ගීත අසන්නට
රොන් උරමින් ඔතනම ඉනු මැනැවී
